Dé CH’TRO AU TROU

 Ed pu tout l’temps j’ai intindu parler ed tro.

Quand jé m’l’avos el mère disot:

« j’espère que t’as bien nettié tes tros d’orelles ».

Min père tapot d’sus mes dots:

« ché pas fait pour ti les mette dins tes tros d’nez ».

Quand ech juos dins ch’coron, cha r’étot l’rengaine:

«fais pas ed tros à tes loques»

Quand j’arvénos dé 1’coopératif cha rouspétot:

«ech t’avos dit ed bien raviser, ch’pain y est plein

d’tros, commint qu’ech va faire ech briquet.

A l’école ch’maite disot : « n’appuies pas si fort,

tu fais des trous ».

Al musique ch’étot l’contraire: «appuies bien d’sus les touches

ed tin saxo pour bien boucher chés tros ».

Min père parlot souvint dé ch’trou d’fosse,

j’acoutos et pis cha m’tracassot

ch’t’histoire ed grand tro.

Comme tant d’autes mi aussi j’ai déchindu.

jé m’rappelle qué l’premier jour, cha faisot tout drôle,

j’in avos min tro… ! bien serré.

A L’armée un parisien m’a dit: « ton village c’est un trou perdu»

mi j’y ai répondu : «ch’ va t’in coller einne comme un coup d’mine

té vas vir ché ti qui s’ras pleins d’tros ».

J’ai même été au trou pas c’qui y avot pas d’tros dins l’cible.

L’temps faisant y z’ont arboucher chés tros d’fosses.

Pour gagner m’croûte, j’ai été travailler al prijon

ché à dire qu’esse sus passé d’ech tro au trou.

Vous veyez mes gins tinal’mint ché toudis einne histoire ed tros.

J’espère vous l’avoir raconté sans trou d’mémoire.