Arcette ed Bon-ne Année
Prénez in viux et grand potreul ;Viux, pace qu'in y fait dé l'bonn' soupe;
Grand, pour pont laicher querre in' goutte.
Touillez in famile ou tout seul.
Dins l'fond, surtout, faut pont qu'cha colle;
Intiquez-y dé l'bonn' santé,
Deux-tros louch's, sans l'mette à coté.
Armuchez bien l'fond dé l'castrole.
Rétramez d'su gramin d'Amour.
Y-in sortira in' flopée d'baisses,
Pour vou'z éfants, cheux dins l'détresse
Et pour vou fimme, chacun sin tour.
El bonheur, chti qui rind bénache,
Mettez-le à l'tubinée, au siau ;
Touillez ches maclot's, ches boursiaux.
Prénez vou temps, sans s'mette in nache.
Echti qu'in partache intr' amis,
Qu'i'l'est pu douche eq dé l'surelle :
Du rir', findu jusqu'à l'z orelles !
ln peut n'in mett' chu qu'y-a d'permis.
Et pour finir, vu qu'ch'est pont toute,
Allez arquerre à vou taïons,
Tous ches parlaches ed nou région.
Cha s'ra nou sé ! I-est temps qu'in goute.
El couvlèche, in' fos arplaché,
Cha mijot'ra s'qu'à l'Saint Sylveste.
Et là, d'azard si qu'i l'in reste.
I séra temps d'arqueumincher !
Aucun commentaire:
Enregistrer un commentaire
Remarque : Seul un membre de ce blog est autorisé à enregistrer un commentaire.