Complainte pour une fosse oubliée.
J’n’ira point fêter l’Unesco,
J’peux point crier cocorico !
Rien qu’à vir t’n’air misérape,
J’iros…je m’sintiros coupape.
D’pis mil neuf chint vingt qu’t’es debout
T’in a bien vu des hommes d’about,
Des mineurs et des galibots,
Et des trieuses…eh bin , té vos..
J’n’ira point fêter l’Unesco
J’ peux point crier cocorico !
Rien qu’à vir t’n’air misérape,
J’iros…je m’ sintiros coupape.
Quand j’ busie que ch’est tes mineurs
Qui ont connu l’imminse bonheur
D’créer l’ canchon « em’ tiote lampiste »,
Mi, m’ lampe all’ va pus, mi j’sus triste !
Mais, dis-me quo qu’t’as pu faire
Pour subir un sort arbitraire ?
In deux mille quate, un pauf’ bébête
T’as d’jà volé tes belles molettes…
Pourquo qu’t’es point dins ch’l’inventaire ?
Tin chevalet d’béton hors-pair,
Tes bâtimints, t’n’invironn’mint…
…J’ peux pas aller à t’n’interr’mint !
J’n’ira point fêter l’Unesco,
J’peux point crier cocorico.
Rien qu’à vir t’n’air misérape,
J’iros…je m’ sintiros coupape.
Mes gins…ch’est l’pauf’ fosse six d’Haisnes
Qu’i n’ faut point laicher querre sus l’ daine.
Ch’ Bassin i rinte dins l’ Patrimoine…
Mais pour elle…qui ch’est qui témoine ?
Aucun commentaire:
Enregistrer un commentaire
Remarque : Seul un membre de ce blog est autorisé à enregistrer un commentaire.