Prière à Sain' Barbe

 Prière à Sain' Barbe

Ch'est ein' bin vieil' prière, al date du moïen ache
Eq ches gins rècitot't pindant ches gros oraches ;
Tous insan.n' rassannés, in face dé l'quéminée,
Pour ète bin protégés par leu sain' vénérée.

« Sain' Barpe, Sain' fleur el couronne ed nou Seigneur,
Quand ch'tonnerre i querra, Sain' Barpe nous protèg'ra ».

Quand l'grond'mint dé ch'tonnerr' faijot peur à ches tchiens,
Quand el ciel in colère menaçot ches pauv's gins,
Ches granches ed foin rirnplies et aussi ches chaumières,
Ch'est vers ell' toudis eq montot chel prière.

« Sain' Barpe, Sain' fleur el couronne ed nou Seigneur,
Quand l'fu du ciel quierra, Sain' Barpe nous protèg'ra >>.

D'ù qu'y-avot du dinger dé ch'fu al protégeot.
Et pour bin l'armercier, ed l'église in sortot,
Dins ch'villache in l'prom'not, ches gins l'avot't si quaire
Eq ch'est in procession qu'i l'suivot't in prière.

« Sain' Barpe, Sain' fleur, l'couronne ed nou Seigneur,
Acoute bin nou prière, protèche bin nou chaumière ».

Dins ches intrall's dé l'tierre quand ch'carbon fut treuvé,
Quand l'grisou in colère menaçot d'ses dingers,
Ches mineurs ont fait d'elle leu patronne bin aimée.
L'ont déchindue au fond, qu'al peuch' sur eux veiller.

« Sain' Barpe, Sain' fleur l'couronne ed nou Seigneur,
Quand el grisou s'ra là, Sain' Barpe nous sauv'ra ».

Quand ch'mineur déchindot au fond pour li ouvrer,
Es feinme dins leu mason vite s'mettot à prier;
S'adréchot à l'tiote Sain', patronne ed sin mineur,
Pour protéger es'n homme, dijot avec ferveur:

« Sain' Barpe, Sain' fleur l'couronne ed nou Seigneur,
Quand ch'dinqer viendra, Sain' Barpe al mé l'gardra ».

A travers chel prière, Sain' Barpe vivra toudis.
Achteur qu'i n'y-a pu d'fosse, y-a gramin d'chomeurs ;
ln s'fra tous ein devoir d'I'apprinte à nou pétits,
Pour impécher l'misère i diront tous in choeur:

« Sain' Barpe, Sain' fleur l'couronne ed nou Seigneur,
O'ches gros craches ed la vie protèche-nous toudis ».