poesies

 L’PAGNAN ET L’ PAIN D’ CUITIE

A mes amis Terroir et Dautel, 1er prix de Rome

Quand j’étos pus jonn’, je m’rappelle
Qué l’ménagère all’ cuisot s’ pain. –
Pou cuire, all’ n’ l’avot point fort belle ;
Mais, étant pauvre, i fallot bin…

Oh ! les bons cantiaux d’ pain d’cuitie,
Larg’s à plaisi, bin arvénus !
Ah ! queull’ bonn’ croûte ! Ah ! quell’ bonne mie !
In f’sot bonn’ chère, – mêm’ sans rien d’sus. –

Pourtant, sans burr’, j’tos prêt à braire.
Mais j’étos bin vit’ consolé :
« -Ming ‘ du pain sec, qu’i m’ disot m’ père,
T’aras des dints blancs comm’ du lait ! »

Et quand j’ n’ai pus été si gosse,
Quand j’ai ouvré, m’ mère, in cuisant,
All’ mé faisot, pour mier à l’fosse,
Eun’ brioch’ qu’in app’lot pagnan.

Oh ! l’bon pagnan ! Ch’étot del pâte
Quin rinfermot un biau gros pon,
Eun’ mioche ed burre, del castonate. –
L’tout cuit au four, comm’ du tourton.

Quand j’avos m’pagnan dins m’ malette,
A l’ foss cha m’ faisot tant d’effet
Qu’i n’ m’in restot pus eun’ milette
Quand arrivot l’heur’ du briquet…

Oh ! ces p’tits riens si biaux d’ la vie,
Jours d’infanc’ pou toudis perdus,
Juteux pagnan ! Bon pain d’ cuitie !
Queu grand dommag’ qu’in n’ vous a pus !