LA MORT D'AZOR

  

Vous êt's surpris' Mari' Charlotte,

De m'vir un air triste comm' tout :

Ah ! taijez vous,

J'in d'viendrai sotte,

D'avoir perdu min biau toutou,

Un quien qu'chétot tout min caprice,

Qû j'aimos mieux qu'un quartron d'saucisse,

Pou n'point payer    s'contribution,

J' l'ai fait noyer in - d'zous d'un pont.         

Azor est mort, P!aingnez, plaingnez min sort !

Azor est mort, P!aingnez, plaingnez min sort !

 

 

Dix francs, pour mi, ch'est eun' fortune,

A ch't heur' que rien n'est bon marqué,

Aussi, j'ai couru à l' Commune,

Afin d' fair' fléchir l'imployé,

Li dij ant : « Veyons, min brave homme,

Vous allez diminuer cheull' somme ? »

I' m'a dit : « N'y-a rien à canger,

Ch'est comme un pain au boulainger.

Azor est mort, P!aingnez, plaingnez min sort !

Azor est mort, P!aingnez, plaingnez min sort !

 

 

Après cheull' répons' claire et nette,

In brayant, je r'tourne à m' mason,

Tout in m' dijant comm' cha dins m' tiête

Uch' que j' trouv'rai ch'l imposition ?

J'avos d' trop, tros tasse', eun' caf'tière,

Eun' quemiche, eun' bai' d' printanière

J' porte cha dins six p'tits lombards

On n' veut m'in donner qu' trint' patards !

Azor est mort, P!aingnez, plaingnez min sort !

Azor est mort, P!aingnez, plaingnez min sort !

 

 

 

Veyant qu'i' faulot m'in défaire,

Aussitôt j vas trouver Bastien

Qui vind des quiens. J' li dis : Compère,

Pernez m'n Azor, je l' donn' pou' rien ! »

II m' répond : « Hélas ! pauver femme,

J' sais pus qu' fair' des miens mi-même,

J'ai des. quiens-loups, des épagnols,

On m' dit qu' ch'est des vieux rossignols. »

Azor est mort, P!aingnez, plaingnez min sort !

Azor est mort, P!aingnez, plaingnez min sort !

 

 

« Ah ! Bastien, vous m'in dite' eun' drôle !

Azor est eun' biêt' plein' d'esprit.

I' n' li manque rien que l' parole,

I' tousse, i' brait, i' cante, i' rit.

Quand j' veux li fair' fair' l'exercice,

J' mets su' s' tiête un bonnet d' police ;

Si j' fais semblant de l' fusiller,

I' bourle et fait l' mort su' l' planquer. »

Azor est mort, P!aingnez, plaingnez min sort !

Azor est mort, P!aingnez, plaingnez min sort !

 

 

« Vous pinsez que j' vous dis des craques,

Allez, Bastien, vous s'abusez.

J' veux bien vous payer des couq'-baques,

S'i' n' fait point chin qu' vous li direz.

D' mandez-li s'i' veut faire eun' danse,

I' va vous faire eun' révérence,

Et n' s'in tir'ra point pus maj'mint

Qu'eun' cantinièr' de régimint. »

Azor est mort, P!aingnez, plaingnez min sort !

Azor est mort, P!aingnez, plaingnez min sort !

 

 

« Avec Azor, vous povez m' croire,

Un faijeu d' tours gaingn'rot sin pain,

Car Munito, ch' fameux quien d' foire,

Tout près d' li n'est qu'un aplopin ^, »

Malgré chin qu' j'ai povu li dire,

Bastien n'a point décessé d' rire ;

Alors, pour soulager min coeur,

J'ai parti in l' traitant d' voleur !

Azor est mort, P!aingnez, plaingnez min sort !

Azor est mort, P!aingnez, plaingnez min sort !

 

 

J'ai donné l'argint d'eun' canette,

Pour in finir, à Gros-Franços,

Qui m'a noyer cheull' pauver biête

In d'zous du pont des Hibernos .

D'puis ch' temps-là, j'ai tell'mint de l' peine,

Que j' brais toudis comme eun' Mad'leine,

Tous l' jour, et mém', quand tout l' mond' dort.

On peut m'intind' crier bien fort

Azor est mort, P!aingnez, plaingnez min sort !

Azor est mort, P!aingnez, plaingnez min sort !