Min cousin est un gas cocasse,
Car il a l'air d'un vrai mouson.
Les dimanche et même à l'ducasse,
l' reste tout seu dins s'mason.
Mais l'prèmier d'avril,
Ah ! ch'est aute cosse,
l' frot brair' de rire eun, pierre à fusil;
In veyant ses tours, même eun' biét' féroce,
Frot fertiller s' queue in marque d'plaisi.
« Ah ! qu'il a l'fil, min cousin Myrtil,
Pour nous fair mainger du pichon d'avril. »
Par eximple, il invoira quère
De l' moutarde à des marchands d' foin,
Des chucade' à l'apothicaire,
A des pâtissiers, du vieux-oing ;
A des carbonniers, un importe-pièche
Pour coper dins l' cuir des langu's d'avocats ;
Il a même eun' fos fait d'mander pa' s' nièche,
L' femell' d'un dindon pour couver des cats.
« Ah ! qu'il a l'fil, min cousin Myrtil,
Pour nous fair mainger du pichon d'avril »
Sans mintir, il a fait pus d' farces
Qu'i' n' se bot d' canett's les lundis,
Il attrap' les femm's les pus harses,
Comme' les homm's les pus dégourdis.
Il invoira l'un li quer des Jeunettes,
In verr' dépoli, doublé d' pinchina (') ;
I' f'ra croire à l's aut's qu'on vot des comètes
Près de !' citadell' danser la polka !
« Ah ! qu'il a l'fil, min cousin Myrtil,
Pour nous fair mainger du pichon d'avril »
Vous l' veyez, j' n'ai point l'air bonnasse,
Par un jour, i' m'a pris, quoiq' cha,
In m' dijant : « Cousin Boniface,
J' viens langreux (z) tell'mint qu' j'ai du ma.
Mais ch' ma, si te l' veux n'ara point d' durance,
Ch'est d'aller pour mi, de l' part du méd'cin,
A l'apothicair' porter ch'l ordonnance
Tros grains d'aloès dins quat' verr's de vin. »
« Ah ! qu'il a l'fil, min cousin Myrtil,
Pour nous fair mainger du pichon d'avril »
Aussitôt, j' parte sans mot dire,
Dins l'espoir d'adouchir sin ma.
L' marchand d' drogue, in se r'tenant d' rire,
Dit : « Min fieu, j' n'ai point che r'mèd'-là. »
D'un air bon infant, ch' biau monsieur m'indique
L' mason d'un méd'cin qui tient cha tout prêt...
Su' !' temps qu'i' in' parlot, sin garchon d' boutique
Passe eun' queu' d' papier in d'zous d' min collet !
« Ah ! qu'il a l'fil, min cousin Myrtil,
Pour nous fair mainger du pichon d'avril »
Sans m' douter qu'on m'a fait cheull' niche.
J' vas trouver l' méd'cin qu'on m'a dit.
J' dis : « Bonjour ! » In voyant m'n affiche,
V'là que ch' drôl' de paroissien rit.
I' lit min billet, pass' dins l' deuxième plache...
J' cros qu'i' sin va quère eun' petit' potion...
I' r'vient : des deux mains, barboull' min visache,
Et me r'pouss' dins l' ru', noir comm' du carbon !
« Ah ! qu'il a l'fil, min cousin Myrtil,
Pour nous fair mainger du pichon d'avril »
In m' veyant dins ch' triste équipache,
Je m' souviens qu' ch'est l' premier d'Avril,
J' vas tout d' suit' laver min visache.
In m' traitant mi-mêm' d'agozil
J'aros bien volu, pour passer m' colère,
Trouver min cousin, vrai, j' l'aros mordu l...
Mais, d'puis ch' moumint-là, -quand j' pinse à ch'l affaire,
Lon de m' désoler, j' cri; comme un perdu
« Ah ! qu'il a l'fil, min cousin Myrtil,
Pour nous fair mainger du pichon d'avril »
Aucun commentaire:
Enregistrer un commentaire
Remarque : Seul un membre de ce blog est autorisé à enregistrer un commentaire.