Te v'là tout surpris Mathurine,
De m'vir un air aussi contint.
Ah ! va, si , j'ai l'bonheur su' l'mine,
Sos bien sur' que ch' n'est point pou' rien.
J'ai mes raisons, j'm'in vas t'les dire.
Malgré l'amitié qui t'as pour mi,
J'pariros qu'chan'te ira point rire,
T'aim'rot mieux ch'bonheur là pour ti. (bis)
Hier, je m' pourmeno' à l' ducasse.
Avec PATRICE m'n amoureux.
Il avo' un air tout cocasse ;
I' n' me parlot qu'avec ses yeux !
« Quoi-ch' que vous avez donc, Patrice ?
Que j' dis, vous n'êt's point d' bonne humeur ? »
Si, qu'i' m' répond, chin qui m' défrisse,
Ch'est qu' j'oss' point déblouquer min cœur! (bis)
Eh quoi ! jeune homm', ch'est-i' possible
D'avoir peur d'eun' jeun' fill' comm' mi !
J' pinsos qu' quand on étot sinsible,
On n'étot point moins dégourdi !
J' veux qu' tout à ch't heur' vo' coeur s' déblouque,
Dit's chin qu' vous pinsez, vite et dru...
N'aiez point peur, malgré m' grand' bouque,
Je n' vous aval'rai point tout cru ! (bis)
Intindant cha, min biau Patrice
Vient tout rouch' comm' du vermillon,
II m' paie eun' kœuche d' pain-n-épice,
Et m' conduit derrière un hayon.
Là, serrant mes mains dins les siennes,
Il m' dit chés mots, tout en trannant
« Croyez-m' si vous volez, Cath'leine,
J'ai pus d'amour qu'un éléphant ! » (bis)
« Quand j' sus tout près d' vous, si j' vous r'louque,
Min sang boû', et puis... j' viens tout frod,
J' sins min pauv' cœur qui fait "doua' douque "
Comme l' queu' de l' cloq' du BEFFRO !
Ch'l amour, qui fait que j' pousse m' plainte,
M'a r'tiré jusqu'à l'appétit,
Et chaq' nuit, tell'mint qu'il m' tourminte,
Pus d'un' fos j' bourle in bas d' min lit. » (bis)
« Allez, que j' dis, mi ch'est tout d' même
Tout d' puis qu' l'amour m'a dins ses graux,
J' peux dir' qu' j' fai' eun' drôl' de femme,
Quand tout l' monde est g'lé, mi j' su' d' caud ;
Si j' pince à vous, min cœur se r'serre,
J' perds l'esprit comme un huberlu...
L'aut' jour, j'ai poivré l' soup' de m' mère
Avec eun' demi-onch' de s'nu. » (bis)
« N'y-a pu' à dire, i' faut, Patrice,
Trouver un bon r'mède à no' ma.
Mi, min chagrin m' donne l' gaonnisse,
Et vous, vous v'nez sec comme un cat.
Si, comme on l' raconte, l' mariache
Sert d'émouquette' à les amours,
Mettons-nous bien vite in ménache,
Et ch' fu s'éteindra dins quéq's jours. » (bis)
Tout cha conv'nu, Patrie' m'imbrasse !,..
Mais, tout près d' nous, j'intinds qu'on rit !...
De m'n amoureux, je m' débarrasse...
In marchant, j' l'intraîne avec mi ! –
Acoute, et te jug'ras de m' peine
Plaché derrièr' nou', un farceux
Avot cousu min jupon d' laine,
Avé' l' capot' de m'n amoureux. (bis)
Mais ch' désagrémint, te peux m' croire,
N'impêch' point min cœur d'êt' joyeux ;
Nous s'allons marier à la foire,
N'est-ch' point chin qu'on peut d'sirer d' mieux !
Quand on est vieil' fille, on s' chagrine
A r'gretter l' temps qu'on a perdu...
Putôt que d' rach'mer Saint'-Cath'eine,
J'aros consolé un bochu ! (bis)
Aucun commentaire:
Enregistrer un commentaire
Remarque : Seul un membre de ce blog est autorisé à enregistrer un commentaire.