Vive les mariés

 Ch’matin in arrivant d’Paris

J’ai dû faire un arrêt à D’nain

Car y fallot que j’fasse el plein.

J’ai rincontré devinez qui ?

 

L’zeff Cafougnettein personne

Qui partot à l’peke à Péronne

Ej’me doute bin qu’cha vous étonne

Mais y m’a dit: non mais t’déconne ?

 

Quand j’y ai appris que j’m’in allos

Du coté d’Saint Amand les Eaux

Pour assister au jubilé

De Papi et Mami Lorgnier.

 

Y n’in croyot pas ses orelles

Ed’ m’intinde dire unne chose parelle.

Y n’croyot pas qué l’temps y’allot

Plus vite que des qu’viaux au galop....

 

A les vir ichi qui croirot

Qu’y a d’jà cinquante ans et neuf mos

Qui z’ont écangé ces anneaux

Qui z’avottent volés aux rideaux.

 

Pour aller s’marier in l’avot

Transportée d’su un vieux vélo

Elle n’avot pas inne gamb’ed’bo

Mais sin pieds din inne band velpo.

 

Aprés seul’min quat à cinq mos

In vit arriver un marmot

Car i z’avottent jeué trop tôt

Au biau jeu del biête à deux dos.

 

In n’a jamais su si chétot

Quéqu’part au milieu d’un p’tit bo

Ou bin à l’ducasse du saubo

Derrière un manéche de q’veaux d’bos.

 

Ou comme cette belle canchon disot

Un biau diminche au bord ed djiau

Inne belle rope blanque elle avot

Et un biau corsache à carriaux.

 

Mais ch’fût l’début d’inne bel’série

D’mouflés plus ou moins réussis

Qui ont grand plaisir aujourd’hui

A fiéter Papi et Mamie.