poesies

 Vous m’connissez point ? Non ? Faut y qu’cha m’étonne,

Vous n’perdez point grand cose, davanche ej vous pardonne.
Ch’est in vieux carbonnier qu’à ses momints perdus
Écrit des radotach’s d’andouill’s mal dépindus.

Si quéqu’fos par hazard pour vous gonfler la rate,
Vous lisez mes écrits, dites-vous bin comarates
Qui faut dél’volonté et surtout dél’passion
Pou composer des vers rimés sans instruction.

S’sus déjà su l’quémin pou l’Mérite à bricoles.
Pou c’décoration-là faut point beaucoup d’école ;
Si jé m’présente un jour vous m’nom’rez Sénateur
Pass’qué s’sus bin certain qu’vous s’rez mes électeurs.

Quarant’ francs tous les jours ! Cha m’in fra des quinzaines
J’arai dé domestiqu’s, des cochers, des méquennes ;
J’vous promets déjà mieux qu’no Député Dupont :
Fait’s vous faire inne rivière et j’vous f’rai un pont.

Si j’vous ai déverti, j’s’rai contint dé m’victoire,
J’n’aspire point à l’grandeur, encore moins à la gloire,
Jé n’sus point imbitieux, n’allez point toutd’touss
M’accabler d’complimints et m’écraser d’bravos.

Ach’teur j’ai inne séquoi su l’cœur faut qu’jé l’répète,
Piss qué tout l’monde el dit jusqu’à front des bowettes,
Cha va fair’ des jalous, mais faut qu’jé l’dich tout court :
Ch’est mi l’pus biau garchon des corons d’Méricourt.