LE GRAISSIER

  

Avec plaisi, j'vos dîns l’bonn' vill' de     Lille,

Des magasins brillants comme à Paris;

Mais comme ou aime un      vieux portrait d'famille,

Du temps passé j'aime     a r’vir les débris.

Aussi quand,j'pass' su' Plachette,  

Tout joyeux j'm'arréte

Près d'un p'tit Graissier,

Et j'crie à m'érailler l'gosier.

Ah ! v’là l’parfait modèle du Graissier !     

Qu'à ch't heure on appelle Epicier

 

Ch' n'est point pou' rien, mes brav's gins, que j' pourmire

Cheull' vieil' boutiq', grand' comme un écourcheu,

J' vas vous l' moutrer du dogt, pour ainsi dire,

Et vous l' trouv'rez pus curieuss' qu'un cat bleu.

Faut d'abord que j' vous einseinne

Qu'elle a pour einseinne,

Sur un banc tortu,

Un p'tit tonniau au lait-battu.

Ah ! v’là l’parfait modèle du Graissier !     

Qu'à ch't heure on appelle Epicier

 

Mais n'allons point tout vir, habile ! habile!

Arrêtons-nou' un moumint su' l' trottoir

V'là des chabots, et, d' gros ramon', eun' pile,

Des ramonchaux, un grand tonniau tout noir

Uch' qu'on débit' de l' braisette,

Avec eun' pellette ;

Deux coués rimplis,

L'un, d' poir's cuite', et l'aute, d' puns cuits.

Ah ! v’là l’parfait modèle du Graissier !     

Qu'à ch't heure on appelle Epicier

 

A ch't heure, introns. Sans parler d' l'épic'rie,

On y vind d' tout, comm' vous allez l' juger

V'là d' l'andoull' d'Air', tout comme à l' charcut'rie,

Des pains, des couque', autant qu'au boulainger ;

Près d'eun' rondell' de p'tit' bière,

Des choux, des puns-d'-tierre ;

Des hérings salés,

Dins d's haricot', accommodés.

Ah ! v’là l’parfait modèle du Graissier !     

Qu'à ch't heure on appelle Epicier

 

Ch'est là qu'on vot des femm's du voisinache,

Tous les matins, fair' leus p'tit's provisions ;

In s' racontant, su' tout point, du ménache.

Les agrémint' et les tribulations,

l' s' faitt'nt servir un p'tit verre,

Ditt'nt : « Au nom du Père 1

Fait's qu'i' sot béni,

Ch'est l' premier qu' j'avale aujord'hui.

Ah ! v’là l’parfait modèle du Graissier !     

Qu'à ch't heure on appelle Epicier

 

Et l'homm' qui tient cheull' petit' vieil' boutique,

A justemint tout l'esprit d' sin métier.

Réglant sin temps comme un papier d' musique,

Il est toudis l' premier l'vé du quartier.

Au point du jour, ouvre s' porte,

Presque aussitôt, sorte,

Et, sans s'écauffer.

In feumant s' pip', brûl' sin café.

Ah ! v’là l’parfait modèle du Graissier !     

Qu'à ch't heure on appelle Epicier

 

Passez par là, dimanche' et jours de fiête,

Et vous l' verrez, tout comm' les jour' ouvrants,

Dins sin comptoir, mêm' s'il a fait s' toilette,

Avé l' costum' des r'vindeux du vieux temps

Un écourcheu à bavette,

In toil' bleusse et nette,

Un bonnet d' coton

Avec eun' mêch' comme un pompon.

Ah ! v’là l’parfait modèle du Graissier !     

Qu'à ch't heure on appelle Epicier

 

Pou' s' fair' bien v'nir, quoiqu'il est assez chiche,

A nos infants, i' donn' des p'tits séquois,

Comme eun' tablette, un bâton d'pain-d'-curiche,

Et, s'lon l' coutume, à l'occasion des Rois,

A chaq' femm' de s' clientèle,

I' donne eun' candelle...

In veyant s' grosseur,

De l' pratique on connot l' valeur.

Ah ! v’là l’parfait modèle du Graissier !     

Qu'à ch't heure on appelle Epicier

 

Et, pour finir, ch'l homm' qui n' sait point ses lettés,

Pour fair' ses compt's, n'a point b'soin d'écrivain.

Vous in s'rez sûrs, homm's, femm', garchons, fillettes,

Si vous intrez dins l' fond d' sin magasin,

Vous verrez, sur eune ardoisse,

Comm' dins l' langu' chinoisse,

Des zigzag' écrits

Ch'est là qu'i' marque ses crédits.

Ah ! v’là l’parfait modèle du Graissier !     

Qu'à ch't heure on appelle Epicier