L'HABIT D' MIN GRAND-PÈRE

 Un homme au sujet de s’ca pote

Qu'i' n'avot porté qu eun' pair' d'ans,

Désolé d'in fair' faire eune aute,

Dijot, in par-lant du vieux temps:

Un habit d'homme,

Ch'é-tot tout com-me

Un vieux portrait qui passe d' main in main,

Et  qui rappelle,

Tout du modèle,

Les qualités, les défauts et l' des­tin.             

Aussi, l'homm' qui l' l'avot fait faire

Mettot ses soins à l’concerver

Et t’nez, chin qui va vous l’prouver

Chez l’habit d’min grand pere

Chez l’habit d’min grand pere

 

 

« Il l'a fait fair' pour sin mariache,

In l'ainné' mil siept chint trint'-tros,

Par un tailleur du voisinache,

Qui n'n a rêvé pindant tros mos,

Car, dins s' boutique,

Jamais pratique,

A ch' point, n'avot qu'mandé rien d'élégant,

Mais, faut tout dire,

L' mieux comme l' pire,

Il a su l' faire aller tout comme un gant. On dit que d' joie i' n'a fait qu' braire Quand il l'a vu si bien porté, Et qu'à l' noc', tout l' monde a vanté

L'habit d' min vieux grand-père. » (bis)

 

 

« Il a mis dix fos cheull' biell' pièche,

Pindant l'espace d' vingt-chinq ans,

Ch'est à les noces d'eun' sueur, d'eun' nièche,

Au baptêm' de ses huit infants,

Mais, les dimanches,

Tout d' puis les manches

Jusqu'au collet, avec soin, i' l' brouchot,

Et ch' l'affair' faite,

Allot l' le r'mette

Dins sin vieux coff'... Là, huit jour', i' restot.

Hélas ! un jour a v'nu l' misère,

Et m' gra'-mèr' d'un air attristé,

A dû porter au mont-d'-piété

L'habit d' min vieux grand-père. » (bis)

 

 

« Min grand-père meurt, mais s'n habit reste

A min pèr' qui l' porte quinze ans ; Alors il in fait faire eun' veste,

In li raccourchichant les pans.

Mais queulle histoire !

In r'venant d' boire,

Eun' fos, min père, à m' mèr', cach' des raisons.

V'là qu'on s' dispute,

V'là qu'on s' culbute,

V'là qu'on s'arrach' les ch'veux, les cotillons... Infin, la paix finit pa' s' faire,

Mais l' lind'main, à peine découché,

Min pèr' brait d' vir, tout arraché,

L'habit d' min vieux grand-père. » (bis)

 

 

« I' n'y avot pus moyen de l' mette,

Sans l' rapticher  d' tous les côtés.

Alors eune idé' pass' dins l' tiête

De m' mèr' qui dit : « Père, acoutez

No' garchon Jacques.

Autour des Pâques,

S'il est savant, f'ra s' première communion.

V'là tout l'affaire,

C'est de l' faire faire

Juste à sin point par un tailleur in r'nom. » Min père a compris qu'i' d'vot s' taire,

In intindant cheull' bonn' raison.

J'ai donc mis, l' jour de m' communion,

L'habit d' min vieux grand-père. » (bis)

 

 

« Quoique solide, il a fini d' rire,

Ch' l'habit si rar', si bon, si biau, Malheureus'mint, j' peux bien vous l' dire,

On n'in trouv' pus même un morciau.

Avec eun' manche,

M' femme, un dimanche,

A rapiéch'té min patalon collant ;

Et t'nez, m' casquette,

Ell' vient d'êt' faite

Dins l'un des pans, et dins l' mitan du d'vant. Infin, quand m' femme a dev'nu mère,

N'aïant point d' pichou  pou' s'n infant,

Ell' s'a vit' servi du restant

D' l'habit d' min vieux grand-père. » (bis)